Adliya bo‘limlaridagi shtatlar faqat huquq uchun xizmat qilishi kerak.
Tuman va shaharlardagi adliya bo‘limlari shtatlarini shunchaki berib qo‘ymaslik kerak.
Bu shtatlar avvalo joylarda fuqarolarning huquq va manfaatlarini himoya qilish, ularga o‘z haq-huquqlarini tanitish va qonunlarning joylardagi ijrosini ta’minlash uchun tashkil qilingan.
Shunday ekan, bu shtatlar qayerda bo‘lmasin faqat va faqat inson huquqlari uchun xizmat qilishi kerak.
Shtatlarni qisqartirishga faqatgina bitta shart bilan, ya’ni ularni bir joyga – sudlarga o‘tkazish sharti bilangina rozi bo‘lish mumkin, deb o‘ylayman. Boshqa variantlarga qarshi turaverish kerak.
Ya’ni, amalda shtatlar saqlanib qolinadi, faqat ular adliya bo‘limlaridan sud tizimiga o‘tkaziladi. Misol uchun, bunda maksimum 4 ta shtat qisqartirilsa, bu shtatlar Oliy sud tarkibiga o‘tkazilib, qo‘shimcha yana 2 ta sudya va 2 ta sudya yordamchisi lavozimi ochilishi mumkin. Bu 400 dan ortiq sudya va 400 dan ortiq sudya yordamchisi degani.
Bu bilan masalan, fuqarolik ishlari bo‘yicha tumanlararo sudlarini va nihoyat fuqarolik ishlari bo‘yicha tuman va shahar sudlariga aylantirish mumkin bo‘lar edi. Oddiy qilib aytganda, har bir tumanda alohida fuqarolik sudlari tashkil qilinishi mumkin.
Natijada minglab odamlar har kunlik sarson-sargardonlikdan qutulgan, eng asosiysi, ish to‘g‘ri taqsimlanishi hisobiga fuqarolik ishlari ham sifatli va adolatli ko‘riladigan bo‘lar edi.
Bu fikrlar fuqarolik jamiyati yuragi bo‘lmish adolatli sud tizimi uchun qayg‘urmaydigan, bu sohaga harajat haqida gapirsangiz ensasi qotadigan moliyachilarimizga yoqmasligi mumkin.
Lekin tepada gapirsa, xatto davlat rahbari ham eshitadigan sud-huquq sohasi vakillari borku, to‘g‘rimi?