Xodim kasal bo‘lib qolgani uchun kasaba uyushmasi qo‘mitasi yig‘ilishida qatnasha olmadi, endi nima qilish kerak?

Question

Ish beruvchi xodimni ishdan bo‘shatishga rozilik berishni so‘rab Kasaba uyushmasi qo‘mitasiga taqdimnoma chiqardi.

Kasaba uyushmasi qo‘mitasi raisi yig‘ilish kunini belgiladi va xodimga ham yozma xabarnoma berdi.

Biroq, kasaba uyushmasi qo‘mitasi yig‘ilishi o‘tkaziladigan kuni xodim yig‘ilishda qatnashmadi, yig‘ilishdan avval xodim 3 kun avval vaqtincha mehnatga layoqatsizlik varaqasi ochtirganini ma’lum qilgan edi. Haqiqatdan ham shunday bo‘lib chiqdi.

Bunday vaziyatda Kasaba uyushmasi qo‘mitasi qanday yo‘l tutishi kerak?

Kasaba uyushmalari federatsiyasi Ijroiya qo‘mitasining 2023 yil 23 maydagi 9-5-sonli qarori bilan tasdiqlangan “Kasaba uyushmasi qo‘mitasi organida mehnat shartnomasini ish beruvchi tashabbusiga ko‘ra bekor qilish to‘g‘risidagi taqdimnomasini ko‘rib chiqish tartibi” 11-bandiga ko‘ra:

➖agar xodim kasaba uyushmasi qo‘mitasi yig‘ilishida vaqtincha mehnatga layoqatsizlik davrida bo‘lganligi sababli qatnasha olmasa, kasaba uyushmasi qo‘mitasi ish beruvchining taqdimnomasiga rad javobi beradi. Bunday holatlarda, ish beruvchi xodimning sog‘lig‘i tiklanib, ishga chiqqanidan keyin kasaba uyushmasi qo‘mitasiga qaytadan taqdimnoma kiritishi mumkin.

❗️Ish beruvchilarga va kasaba uyushma qo‘mitalariga maslahatimiz, hushyor bo‘ling va mana shunaqa qoida borligini  ham unutmang.