1 YIL AVVAL QO‘SHNIMNI SO‘KIB QO‘YGANDIM, U VIDЕOGA OLVOLGAN EKAN, PROKURATURAGA BЕRAMAN DЕYAPTI.
SAVOL.
Assalomu-alaykum. Bundan bir yil avval men qo‘shnim bilan janjallashganman. O‘sha vaqtda qizishib so‘kib tashlagan edim, qo‘shnimning o‘zi shunga majbur qilgan edi. Undan keyin mahalladagi kattalarni gapi bilan yarashib ketganmiz, men ham kechirim so‘raganman. Lekin u o‘sha voqeani videoga yozib olgan ekan, o‘rtaDa yana gap qochsa, videoni ko‘rsatib prokuraturaga yozaman, jinoiy ish ochtiraman deb qo‘rqitib kelyapti. Shunday qilishi mumkinmi?
JAVOB.
So‘kish. So‘kish albatta bu haqorat. Siz qo‘shningiz bilan o‘zaro janjal vaqtida uni haqorat qilganingiz aniq.
Jinoyat kodeksining 140-moddasi birinchi qismida haqorat qilganlik, ya’ni shaxsning sha’ni va qadr-qimmatini beodoblik bilan qasddan tahqirlaganlik uchun, basharti, shunday harakatlar uchun ma’muriy jazo qo‘llanilgandan keyin sodir etilgan bo‘lsa, — BHMning 200 yuz baravarigacha miqdorda jarima yoki 240 soatgacha majburiy jamoat ishlari yoxud 1 yilgacha axloq tuzatish ishlari bilan bog‘liq jazo berilishi ko‘rsatilgan.
Sizdagi vaziyatda JK 140-moddasining keyingi qismlaridagi alohida og‘irlashtiruvchi holatlar yo‘q degan fikrdamiz, ya’ni siz oddiy kundalik hayotingizda qo‘shningiz bilan o‘zaro muloqotda bu harakatni sodir qilgansiz.
Yuqorida e’tibor bergan bo‘lsangiz, JK 140-moddasi birinchi qismida “shunday harakatlar uchun avval ma’muriy jazo qo‘llanilgan keyin sodir etilgan bo‘lsa” deyilmoqda. Ya’ni, agar siz avval haqorat qilganlik uchun ma’muriy jazoga tortilmagan bo‘lsangiz, demak jinoiy jazoga olib keladigan jinoyat sodir etmagansiz.
Bunday vaziyatda haqorat bilan bog‘liq harakatingiz uchun sizga Ma’muriy javobgarlik to‘g‘risidagi kodeksning 41-moddasiga binoan BHMning 20 barobaridan 40 barobarigacha ma’muriy jarima belgilanishi mumkin bo‘lardi.
Biroq, Ma’muriy javobgarlik to‘g‘risidagi kodeksning 36-moddasida ma’muriy jazo huquqbuzarlik sodir etilgan kundan boshlab 1 yildan kechiktirmay qo‘llanilishi mumkinligi ko‘rsatilgan. Demak, agar haligi janjal voqeasiga o‘zingiz aytganingizdek, bir yil o‘tib ketgan bo‘lsa, tamom, jazo qo‘llash muddati o‘tib bo‘lgan. Bunday hollarda sizga nisbatan ma’muriy jazo ham qo‘llanilishi mumkin emas.
Hullas hotirjam bo‘lishingiz mumkin. Lekin muddat o‘tib ketganakan, deb yana o‘zingizdan ketib qolmang. Haligi qo‘shningizga “ana, muddat o‘tganakan, endi videoingni faloningga tiqib qo‘y” devorsangiz, hammasi boshidan boshlanib qolmasin tag‘in. Bilib bo‘ladimi.