Ishga qabul qilishni rad etish haqidagi javob xati qancha vaqtda berilishi kerak?
Mehnat kodeksining 119-moddasi uchinchi qismida “ishga qabul qilish rad etilgan taqdirda, ish beruvchi ishga qabul qilish huquqiga ega bo‘lgan mansabdor shaxs tomonidan imzolangan ishga qabul qilishni rad etish sabablarining yozma asosini ishga qabul qilinishi rad etilgan shaxsning talabiga ko‘ra uch kunlik muddatda taqdim etishi shart” deyilgan.
Ya’ni, agar ishga kirish uchun murojaat qilgan shaxs ishga qabul qilish nima uchun rad qilingani va bunga nima asos bo‘lgani haqida rasmiy munosabat berishni talab qilsa, ish beruvchi unga yozma xat bilan javob qaytarishga majbur.
Ayrim ish beruvchilar ishga qabul qilishni rad etish haqidagi javob xati 15 kun ichida berilishi kerak deb o‘ylaydi. Ular “Jismoniy va yuridik shaxslarning murojaatlari to‘g‘risida”gi qonunning 28-moddasidagi arizani ko‘rib chiqish bo‘yicha belgilangan 15 kunlik muddatdan kelib chiqib shunday fikrda bo‘ladi.
Lekin ahamiyat bering, MK 119-moddaning uchinchi qismida “3 kunlik muddatda taqdim etishi shart” deyilgan. Nima deb o‘ylaysiz, qaysi biri to‘g‘ri?
Qarang, “Jismoniy va yuridik shaxslarning murojaatlari to‘g‘risida”gi qonunning 1-moddasida ushbu qonunning ko‘rib chiqish tartibi ma’muriy javobgarlik to‘g‘risidagi, fuqarolik protsessual, jinoyat-protsessual, jinoyat-ijroiya, iqtisodiy protsessual qonunchilik va boshqa qonun hujjatlari bilan belgilangan murojaatlarga tadbiq etilmasligi belgilangan.
Ya’ni, bu qonun va undagi tartib, jumladan, 15 kun ichida arizaga javob berilishi haqidagi qoida ayrim murojaatlarni ko‘rib chiqish tartibi boshqa qonun hujjatlari belgilangan murojaatlarga taqdim etilmaydi.
Mehnat kodeksi ishga kiruvchi shaxslarning murojaatini ko‘rib chiqish va javob xati berishga oid boshqacha tartib belgilangan ana shunday qonun hujjatlaridan biri hisoblanadi.
Demak, necha kunda javob qaytarish kerak ekan? MK 119-moddasida ko‘rsatilganidek 3 kunda, kelishdik-a