Umumiy pensiya yoshini 5 yilga qisqartirgan holda pensiyaga chiqish mumkinmi?
@Yurist_Xizmati 4413-savol:
Assalomu alaykum yurist xizmatiga savol bilan murojaat kilmokchi edim. 1 joyda ya’ni akliy va jismoniy rivojlanishi orkada kolgan (nogironligi bor) bolalar uchun ixtisoslashtirilgan maktabda 25 yil ish stajiga ega bulgan pedagog xodim yoshidan kat’iy nazar imtiyozli pensiyaga chikishi mumkinmi yoki yosh chegarasi bormi? Tuman pensiya jamgarmasiga kilgan murojaatimga tayinli javob ololmadim
YURIST JAVOBI:
❗️Pensiyaga chiqishda ish stajidan tashqari yoshga oid meyor ham belgilanadi. Umumiy qoida bo‘yicha yoshga doir pensiya olish huquqiga:
➖ erkaklar — 60 yoshga to‘lganda va ish stajlari kamida 25 yil bo‘lgan taqdirda;
➖ ayollar — 55 yoshga to‘lganda va ish stajlari kamida 20 yil bo‘lgan taqdirda ega bo‘ladilar.
Bu Fuqarolarning davlat pensiya ta’minoti to‘g‘risidagi qonuni 7-moddasida mustahkamlangan. Shu bilan birga pensiyaga chiqish yoshini kamaytirish bo‘yicha bir qator imtiyoz bor.
Bularning birinchisi ushbu qonun 12-1-moddasida belgilangan, unga ko‘ra kamida 20 yillik ish staji bo‘lgan ayollar 54 yoshga to‘lganda pensiya olish huquqiga ega bo‘ladilar.
Bundan tashqari qonun 10-moddasida yoshidan qat’i nazar imtiyozli pensiya olish huquqiga ega kasblar toifasi belgilangan.
Biroq ular qatorida aqliy va jismoniy rivojlanishi orkada kolgan (nogironligi bor) bolalar uchun ixtisoslashtirilgan maktab pedagog xodimlari keltirilmagan.
Ushbu qonun 9-moddasi hamda Vazirlar Mahkamasining 1994-yil 12-maydagi 250-son “Imtiyozli shartlarda pensiyaga chiqish huquqini beruvchi ishlab chiqarishlar, muassasalar, ishlar, kasblar, lavozimlar va ko‘rsatkichlarning ro‘yxatini tasdiqlash to‘g‘risida”gi qarorida tasdiqlangan Umumiy belgilangan yoshni 5 yilga qisqartirilgan holda pensiya olish huquqini beradigan ishlab chiqarishlar, muassasalar, ishlar, kasblar, vazifalar va ko‘rsatkichlarning 3-sonli ro‘yxati 7-qismida nogiron bolalar uchun ixtisoslashtirilgan ta’lim muassasalari, Mehribonlik uylari, harbiy akademik litseylar, o‘quv koloniyalari o‘qituvchilari keltirilgan.
✅ Shunga ko‘ra siz ham umumiy pensiya yoshini 5 yilga kamaytirgan holda pensiyaga chiqishingiz mumkin.