2021 YILDA OYLIGIMNI KAMAYTIRISHGAN, SUDGA BЕRSAM YUTOLAMANMI?
SAVOL.
Yuqori turuvchi tashkilot buyrug‘iga asosan meni arizamsiz lavozimim nomini o‘zgartirib maoshimni kamaytirishdi. 2021 yilda. Xozir shu ishni sudga berib o‘z foydamga hal qilsam buladimi?
JAVOB.
Qiyin masala deb o‘ylayman.
Sababi, Mehnat kodeksining 560-moddasiga asosan yakka tartibdagi mehnat nizosining ko‘rib chiqilishi uchun sudga murojaat qilishning quyidagi muddatlari belgilangan:
➖ishga tiklash to‘g‘risidagi nizolar bo‘yicha — xodimga u bilan mehnat shartnomasi bekor qilinganligi haqidagi ish beruvchi buyrug‘ining ko‘chirma nusxasi topshirilgan kundan e’tiboran 3 oy;
➖xodim tomonidan ish beruvchiga yetkazilgan moddiy zararning o‘rnini qoplash to‘g‘risidagi
nizolar bo‘yicha — ish beruvchi zarar yetkazilganligini aniqlagan kundan e’tiboran 1 yil;
➖boshqa mehnat nizolari bo‘yicha — xodim o‘zining huquqi buzilganligi to‘g‘risida bilgan yoki bilishi kerak bo‘lgan kundan e’tiboran 6 oy.
Siz aytgan holat uchinchi da’vo muddatiga, ya’ni boshqa mehnat nizolariga tortadigan talab bo‘yicha xoov o‘shanda huquqingiz buzilganligini bilgan vaqtingizdan boshlab 6 oy ichida da’vo beriladigan vaziyatga tortadi.
(2023 yil 30 aprelgacha amalda bo‘lgan eski Mehnat kodeksida (270-moddasida) bu muddat 3 oy edi).
Agar sud davomida ish beruvchi tomoni da’vo muddatini qo‘llash haqida ariza kiritsa va sizda muddatni o‘tkazib yuborish bilan bog‘liq uzrli sabab bo‘lmasa, sud da’vo muddati o‘tgan deb da’vongizni rad qilishi ham mumkin.
Axir oradan qancha vaqt o‘tib ketganu, to‘g‘rimi?