Elektron sigaretalarning tashqi ko‘rinishi aldamchi bo‘ladi
Elektron sigaretalar ommalashib borayotganiga uning zamonaviy ko‘rinishi ham sabab bo‘lmoqda. Afsuski, bunga aldanib, organizmini zaharlashga odatlanib qolayotgan yoshlar talaygina.
— Ba’zi elektron sigaretalar odatiy tamaki mahsulotlariga o‘xshasa-da, ularning ayrimlari bolalar va o‘smirlarni o‘ziga jalb qilish uchun kundalik ishlatiladigan buyumlar, masalan, bolalar multfilmlaridagi suratlar tushirilgan ruchkalar, USB-flesh kartalar shaklida ishlab chiqarilmoqda, — deydi Sog‘liqni saqlash vazirligining tamakiga qarshi kurashish bo‘yicha bosh konsultanti Shuhrat Shukurov.
♻️ — Bunday marketing yondashuvi elektron sigaretalarni, ayniqsa, yoshlar orasida ommalashishiga sabab bo‘lyapti.
Batareykalar quvvati va elektron sxemalaridagi har xillik tufayli bunday mahsulotlar bir-biridan jiddiy farq qilishi mumkin.
Ulardagi nikotinning organizmga so‘rilishi tutunni tortish davomiyligi, nafas olish va foydalanish chastotasi, shuningdek boshqa omillarga ham bog‘liq.
Ba’zi chekuvchilar nikotin yoki boshqa narkotik moddalarning organizmga so‘rilishini yaxshilash maqsadida elektron sigaretalarning konstruksiyasini o‘zgartirishi, masalan, akkumulator quvvatini oshirishlari kuzatiladi. Bu esa sog‘liq uchun jiddiy xavf tug‘diradi.
Bir marta foydalaniladigan elektron sigaretalar nikotinli suyuqlikni almashtirib yoki qaytadan to‘ldirib bo‘lmaydigan sig‘imda bo‘ladi.
Qurilmadagi bug‘latgich va bir marta foydalaniladigan batareya suyuqlik tugagandan so‘ng tashlab yuboriladi.
⚠️ Bir martalik elektron sigareta 300 va undan ko‘p marta tortishga mo‘ljallangan. Unda nikotin miqdori 1 millilitrda 60 milligrammni tashkil etadi. Bu odatdagi 3 ta quti sigaretadagi nikotin miqdoriga teng.