"GAI" TUZGAN BAYONNOMANI QANDAY BЕKOR QILDIRSA BO‘LADI?
Ma’muriy sud ishlarini yuritish to‘g‘risidagi kodeksining 26-moddasiga binoan ma’muriy sudga fuqarolar va yuridik shaxslarning buzilgan yoki nizolashilayotgan huquqlari, erkinliklari va qonuniy manfaatlarini himoya qilish to‘g‘risidagi, ma’muriy va boshqa ommaviy huquqiy munosabatlardan kelib chiqadigan ishlar taalluqlidir.
Shuningdek, kodeksning 27-moddasiga ko‘ra Sud mahalliy davlat hokimiyati organlarining, davlat boshqaruvi organlarining, ma’muriy-huquqiy faoliyatni amalga oshirishga vakolatli bo‘lgan boshqa organlarning, fuqarolar o‘zini o‘zi boshqarish organlarining va ular mansabdor shaxslarining qonunchilikka mos kelmaydigan hamda fuqarolar yoki yuridik shaxslarning huquqlarini va qonun bilan qo‘riqlanadigan manfaatlarini buzadigan qarorlari, harakatlari (harakatsizligi) yuzasidan nizolashish to‘g‘risidagi ishlarni hal qiladi.
E’tibor bering! Kodeksning 32-moddasiga asosan fuqaroning yoki yuridik shaxsning arizasi (shikoyati) qarorlari, harakatlari (harakatsizligi) ustidan shikoyat qilinayotgan ma’muriy organ joylashgan yer yoxud mansabdor shaxsning ish joyi bo‘yicha sudga taqdim etiladi.
Demak, Siz ma’muriy bayonnomani haqiqiy emas deb topish to‘g‘risidagi ariza bilan sizga bayonnoma tuzgan organ joylashgan yer yoxud mansabdor shaxsning ish joyi bo‘yicha ma’muriy sudga murojaat qilishingiz mumkin.