Meni majburiy ishdan bo‘shatishmoqchi?
Mening qanday huquqlarim qanday?
✅ MK 160-moddasiga ko‘ra, xodim nomuayyan muddatga tuzilgan mehnat shartnomasini, shuningdek muddati tugaguniga qadar muddatli mehnat shartnomasini 14 kalendar kun oldin bu haqda ish beruvchini yozma shaklda ogohlantirgan holda bekor qilishga HAQLI. Ayrim toifa xodimlarga o‘z tashabbusiga ko‘ra bekor qilinganda ish beruvchini ogohlantirishning boshqa muddatlari belgilangan (MK 489, 494, 499, 503, 506, 511, 518-moddalariga qarang).
⚠️ E’tibor bering, bekor qilishga haqli deyilmoqda, ya’ni bu sizning huquqingiz.
❗️Bundan tashqari, O‘zbekiston Respublikasi Oliy sudi Plenumining 17.04.1998 yildagi 12-son “Sudlar tomonidan mehnat shartnomasi (kontrakti)ni bekor qilishni tartibga soluvchi qonunlarning qo‘llanilishi haqida”gi qarori 15-bandiga ko‘ra, mehnat shartnomasini bekor qilishga xodim shu korxonadagi ishni haqiqatda tashlab ketish istagini bildirgan yozma arizasiga binoan yo‘l qo‘yiladi. Sudlar da’vogarning mehnat shartnomasini bekor qilish haqidagi arizani ish beruvchining qistovi natijasida berganligi to‘g‘risidagi vajlarini sinchkovlik bilan tekshirmoqlari lozim
❗️Agar xodim men arizani ish beruvchining qistovi natijasida berganman degan da’vo bilan chiqsa, mehnat shartnomasini bekor qilinishining asosliligini isbotlab berish majburiyati ish beruvchi mas’uliyatiga yuklatilishini esdan chiqarmaslik lozim (Asos: Mehnat kodeksi 174-moddasi).
Demak, ish beruvchi Sizni ishdan bo’shatishning asosliligini isbotlab bera olmasa, Sud Sizni ishga tiklaydi.
⚠️Eslatma! Sudga xodimga u bilan mehnat shartnomasi bekor qilinganligi haqidagi buyruqning nusxasi berilgan kundan boshlab 3️⃣ oy ichida murojaat qilish kerak. Muddat uzrli sabablarga ko’ra o’tkazib yuborilgan taqdirda, sud muddatni qayta tiklashi mumkin (Asos: Mehnat kodeksi 560-moddasi)!