GAI XODIMLARI “AVTOTЕST” SЕRTIFIKATI YO‘QLIGI UCHUN MASHINANI JARIMA MAYDONIGA OLIB KЕTISHI MUMKINMI?
Assalomu-alaykum. Savolimga javob bersangiz iltimos. Men davlat tashkilotida xaydovchi bo‘lib ishlayman. Kecha mashinada ketayotganimda GAI xodimlari to‘xtatib, hujjatlarni so‘radi. Hujjatlarni orasida “Avtotest”dan malaka oshirganlik sertifikati yo‘q deb avtomashinani majburan jarima maydoniga olib ketdi, men iltimos qilsam ham, ko‘nmadi, men bayonnoma tuzavering, lekin mashinaga tegmang desam ham rozi bo‘lmadi. Shu ish to‘g‘rimi? Rahbarimizni hali bundan habari yo‘q.
JAVOB:
Yo‘q, Ichki ishlar organlari xodimlarining ushbu harakatlarini noto‘g‘ri deb hisoblayman. Hozir buni tushuntiraman.
To‘g‘ri, Ma’muriy javobgarlik to‘g‘risidagi kodeksining 135-moddasiga asosan, yo‘l harakati qoidalarida nazarda tutilgan hujjatlari bo‘lmagan shaxslarning transport vositalarini boshqarishi haqiqatdan ham ma’muriy huquqbuzarlik hisoblanadi.
Transport vositalarini boshqarish huquqi bo‘lgan shaxs tomonidan tegishli hujjatlarsiz, (shuningdek, yuridik shaxsning xaydovchisi malaka sertifikatisiz) transport vositasini boshqarishi bazaviy hisoblash miqdorining bir baravari miqdorida, ya’ni 223.000 so‘m miqdorida jarima solishga sabab bo‘ladi.
Ma’muriy javobgarlik to‘g‘risidagi kodeksning 291-moddasi birinchi qismi a-bandida MJtKning 135-moddasida ko‘rsatilgan huquqbuzarlikni sodir etganlik holatida ichki ishlar organlari huquqbuzar boshqaruvidagi transport vositasini ushlab turishi mumkinligi ko‘rsatilgan.
Lekin, ana shu 291-moddaning a-bandiga yaxshilab e’tibor bersak, 135-moddadagi “haydovchilarning malaka oshirishdan o‘tganligi to‘g‘risidagi sertifikati yonida mavjud bo‘lmaganligi hollari bundan mustasno” deb ko‘rsatilgan.
Demak, shunga ko‘ra, MJtKning 135-moddasida ko‘rsatilgan yo‘l harakati qoidalarida nazarda tutilgan hujjatlari bo‘lmagan shaxslarning transport vositalarini boshqarishi” bilan bog‘liq huquqbuzarlik, agar malaka sertifikati hujjati yo‘qligi bilan bog‘liq bo‘lsa:
BUNDAY VAZIYATLARDA TRANSPORT VOSITASINI USHLAB TURISH VA JARIMA MAYDONIGA OLIB KЕTISH MUMKIN EMAS.
Maslahatim, avtotransportni majburan olib ketgan yo‘l patrul xizmati xodimining yuqori bo‘linmasidagi rahbar shaxslarga yoki tegishli navbatchilik qismiga biz keltirgan asoslarni keltirib shikoyat qiling, muammo shu bugunoq hal bulishi mumkin.