FILIAL RAHBARI BILAN MUDDATLI SHARTNOMA TUZISH MUMKINMI?
SAVOL.
Men sug‘urta kompaniyasida kadr bo‘lib ishlayman, bizda hududlarda filiallarimiz bor. Aytingchi, filial rahbari bilan muddatli shartnoma tuzsak bo‘ladimi?
JAVOB.
Albatta bo‘ladi. Faqat bunga o‘sha filial rahbarilikka ishga olinadigan fuqaro ham rozi bo‘lishi kerak.
Mehnat kodeksining 113-moddasida xodim va ish beruvchi o‘rtasidagi kelishuvga ko‘ra muddatli mehnat shartnomasi tuzilishi mumkin bo‘lgan holatlar bor.
Ushbu holatlar qatorida:
“agar qonunda boshqacha qoida nazarda tutilmagan bo‘lsa, o‘z tashkiliy-huquqiy shakllaridan va mulkchilik shakllaridan qat’i nazar, tashkilotlarning rahbarlari, rahbar o‘rinbosarlari va bosh buxgalterlari, shuningdek ular alohida bo‘linmalarning rahbarlari” ham ko‘rsatilgan.
Ya’ni, qaysidir qonun bilan cheklov o‘rnatilmagan bo‘lsa, alohida bo‘linmalar rahbarlari bilan ham muddatli mehnat shartnomasi tuzilishi mumkin.
Ish beruvchi bo‘lajak filial rahbariga "siz bilan 1 yilga muddatli shartnoma tuzamiz, qarshi bo‘lmasangiz" desa va bunga o‘sha fuqaro rozi bo‘lib, muddatli shartnomaga imzo qo‘ysa, demak jarayon qonuniydir.
Ma’lumot uchun, MK 19-moddasiga asosan filial tashkilot alohida bo‘linmasiga yaqqol misoldir.