Sudlanganlikni qanday olib tashlasa bo‘ladi?
@Yurist_Xizmati 4341-savol:
Sudlanganlikni qanday oldirib tashlasam bo‘ladi. Nima hujjatlar kerak bo‘ladi? Sudga iltimosnoma kiritilar ekan iltimosnomani yozilish tartibi qanaqa shu haqida ma'lumotlarni berib o‘tsangiz. Javob uchun oldindan rahmat
YURIST JAVOBI:
Jinoyat kodeksiga muvofiq Shaxsning sudlanganlik holati quyidagi paytlarda o‘zi tugallanadi:
shartli hukm qilinganlarga nisbatan — sinov muddati tugagan kundan boshlab;
majburiy jamoat ishlari, xizmat bo‘yicha cheklash yoki intizomiy qismga jo‘natish tarzidagi jazolarini o‘tab chiqqach;
jarima jazosi ijro etilgan kundan keyin, shuningdek muayyan huquqdan mahrum qilish yoki axloq tuzatish ishlari jazolari o‘talganidan keyin 1 yil o‘tgach;
ozodlikni cheklash jazosi o‘talganidan keyin — 2 yil o‘tgach;
besh yildan ko‘p bo‘lmagan muddatga ozodlikdan mahrum qilish jazosi o‘talganidan keyin — 4 yil o‘tgach;
besh yildan ortiq, lekin o‘n yildan ko‘p bo‘lmagan muddatga ozodlikdan mahrum qilish jazosi o‘talganidan keyin — 7 yil o‘tgach;
o‘n yildan ortiq, lekin o‘n besh yildan ko‘p bo‘lmagan muddatga ozodlikdan mahrum qilish jazosi o‘talganidan keyin — 10 yil o‘tgach.
Agar shaxs ozodlikdan mahrum qilish jazosini o‘tab bo‘lganidan keyin unga nisbatan ma’muriy jazo yoki intizomiy ta’sir choralari qo‘llanilmagan bo‘lsa, jamoat birlashmasi, fuqarolarning o‘zini-o‘zi boshqarish organi, jamoa yoki jazoni o‘tab chiqqan shaxsning o‘zi bergan iltimosnomasiga ko‘ra sud Jinoyat Kodeksining 78-moddasida nazarda tutilgan muddatlarning kamida yarmi o‘tganidan keyin uning sudlanganligini olib tashlashi mumkin.
♂️ Sudlanganlikni muddatidan ilgari olib tashlash to‘g‘risidagi iltimosnoma sudlanganlik holati mavjud shaxs, uning himoyachisi yoki qonuniy vakilining yoxud jamoat birlashmasi yoki jamoa tomonidan jazoni o‘tab chiqqan shaxs yashash joyidagi tuman (shahar) sudiga berilishi mumkin.
❗️Sudlanganlikni muddatidan ilgari olib tashlash masalasini hal etishda, sud sudlanganlik holati mavjud shaxsning qonunga itoatkor turmush tarzini tasdiqlovchi holatlarni (huquqbuzarlik mavjud emasligi, jazo o‘tashdan ozod qilingandan keyingi xulq-atvori, ishlash va yashash joyidan ijobiy tavsifnomalar, ichki ishlar organi axborot markazi ma’lumotnomasi mavjudligi va h.k.) aniqlashi zarur.