Bolaga kimligingizni ahamiyati yo'q bola mehr ko'rganiga talpinadi

Question

Bolaga kimligingizni ahamiyati yoʻq. Bola mehr koʻrganiga talpinadi.

Ayol asabiy boʻlib qoldi. Bazm boshlandi deguncha oʻgʻli allaqayerga gʻoyib boʻldi. Shoshib chiqib ketgan ekanmi,  telefonini ham qoldirib ketibdi. U oʻgʻlini koʻz ostiga olgan bir dugonasining qizi bilan tanishtirishni moʻljallagandi. Bugunga nasib qilmagan ekan. Mana mehmonlar ham ketib boʻlishdi. Dugonasi-yu uning qizi ham.

Soat kechki sakkizdan oshganda ayolning oʻgʻli manun kayfiyatda kirib keldi. Tinchi yoʻqolgan ayol oʻgʻli eshik oldida paydo boʻlishi bilan uning oldiga yugurib keldi.

– Qayerga gumdon boʻlding bir pasda? Mehmonlarga ham hurmating shumi?

Yigit onasiga uzrxoh ohangda dedi:

– Axir sizni tabriklab, keyin ketdimku?  Bugun...

– Men buni aytmayapman. Mehmonlarni tashlab ketganingga aytyapman.

– Oyi, ular sizning tugʻilgan kuningizga kelishgan. Sizning doʻst-dugonalaringiz. Bugun...

– Bugun ana shu doʻst-dugonalarim odamyoqtirmas oʻgʻlim borligiga shohid boʻlishdi. Xoʻsh, qayoqlarda sandiroqlab yuribsan? Qayerda eding?-ovozi xiyol koʻtarildi ayolning. Yigit onasining oʻktam nigohiga dosh berolmay koʻzlarini quyiga tikdi va dedi:

– Halima opanikiga borgandim. Bugun...

– Kim u Halima opang?-oʻgʻlining gapini boʻlib oʻshqirdi ayol.

– Menga  oʻn yil enagalik qilgan ayol.

Enagani unutib yuborganiga yillar boʻlgan ayol ilkis yumshadi. Bir nima demoqchi boʻlib endi ogʻiz juftlamoqchi edi, oʻgʻli keyingi soʻzini aytdi:

– Bugun u kishining ham tugʻilgan kuni edi...