Chaqaloqda sariq kasal
Yangi tug'ilgan chaqaloqda ikki xildagi sariq kasal mavjud bo'ladi. Birinchisi bu fiziologik (normal) sariq kasal bo'lsa, ikkinchisi esa patalogik (kasallik) sariq kasal.
Go'dak jigari juda kichik bo'lgani uchun u tug'ilganidan so'ng organizmida tezlik bilan ajraladigan billirubin moddasini (sariq rang beruvchi modda) tez parchalay olmaydi. Kattalar organizmda billirubin har kuni ajralib darhol parchalanib ketish imkoniyatiga ega. Kichik bolalarda tug'ilgan kunidanoq billirubin ajralishi jadallashadi. Uni parchalashga ayrim bolalarning jigari kuchi yetmaydi. Shunda bola sariq rangda bo'lib qolishi kuzatiladi. Bu normal fiziologik sariq kasalidir. Bolada billirubin ajralishi jigar funksiyasiga tenglashganida (ko'pincha 1 oy ichida) sariq rang o'z-o'zidan yo'q bo'lib ketadi. Buning hech qanday zarari ham bo'lmaydi.
Patalogik sariq kasal bola tug'ilishi bilan bir soat ichida kuzatiladi. Shu jarayonda qondagi qizil moddalar juda tez parchalanib ketadi va bola tanasining rangi qizil bo'lmay sariqlasha boradi. Vaqtida tug'ilgan bolada bu kasallik hech qanday asoratsiz davolanishi oson. Lekin vaqtidan oldin tug'ilgan yoki kasal tug'ilgan bolalarda qiyinchilik bilan o'tadi. Bu kasallik ko'pincha ona bilan bolaning qon rezusi yoki qon guruhi bo'yicha ziddiyatlik paydo bo'lganda rivojlanadi. Homiladorlik vaqtida ginekolog bunga alohida ahamiyat bermog'i lozim.
❗️Agar bolangizda sariqlik sezib qolsangiz albatta vrachga murojaat qilib uning kelib chiqishi normal yoki patalogik ekanligini aniqlang. Agar normal sariq kasal bo'lsa, u holda bolaga oddiy sog'lom bolani parvarish qilgandek qarang. Hech qanday dori ichirmang! Agar patalogik sariq kasal bo'lsa, u holda vrach o'zi qondagi billirubin moddasini o'sishi darajasiga qarab muolaja qiladi.
Normal sariq kasal bo'lgan bolani aslo ko'krak sutidan ajratmang, chunki ona suti bunga umuman salbiy ta'sir ko'rsatmaydi.