Qo‘ying, mayli, yig‘lasin!
Biz ko‘pincha o‘g‘il bolalar yig‘laganda "O‘g‘il bola ham yig‘laydimi?! Yig‘lama!" deb uni jim qilishga harakat qilamiz. Vaholanki, yig‘lash qalbdagi tuyg‘u va hissiyotni yumshatadi, ko‘z yosh ko‘zni ravshan qiladi, baʼzida esa boshdan o‘tayotgan xursandchilik va xafalik sababli ichdan keladi. Demak, bu jihatdan yig‘lash foydalidir, faqat ayollarga xos emas, erkaklik uni man qilmaydi. Masalan, Payg‘ambarimiz alayhissalom o‘g‘illari Ibrohim vafot qilganda yig‘laganlar. Shuning uchun bolalarni erkaklar yig‘lamaydilar deb yig‘lagan zahotiyoq to‘xtashga buyurib, ularni yig‘lashdan qaytarishimiz to‘g‘ri emas.
Yig‘lashni man qilish uning tuyg‘ulariga xo‘jayinlik qilishdir. Bunday qilish yaramaydi. Siz tuyg‘ular natijasida yuzaga keladigan salbiy harakatlardan qaytarishingiz mumkin. Masalan, "yig‘laganingda yerga yotib olma" kabi.