Onamga aytib qo'ymang

Question

Xasrat...

Ag‘yor mag‘lub yetganin,
Omad qo‘ldan ketganin,
Alam jondan o‘tganin,
Onamga aytib qo‘ymang...

Dardiga bo‘lmay chipqon,
Og‘rimasin mushtdek jon,
O‘zim topaman imkon,
Onamga aytib qo‘ymang...

Kulgan onimni ko‘rsin,
Xushnud jonimni ko‘rsin,
Quvonch konimni ko‘rsin,
Onamga aytib qo‘ymang...

Sinovlar bor xar boshda,
Bu hayot bag‘ritoshda,
Umid bor sabr-doshda,
Onamga aytib qo‘ymang...

Imtixon bandaga hos,
Sinalyapmiz juda soz,
Shu bir so‘rovim holos,
Onamga aytib qo‘ymang...

Gul ko‘ngli g‘ashlanmasin,
Xavotir boshlanmasin,
Ko‘zlari yoshlanmasin,
Onamga aytib qo‘ymang...

Bu kunlar ham ketadi,
Baxt ko‘nglim shod etadi,
Siz bilsangiz yetadi,
Onamga aytib qo‘ymang...

Yengaman barin o‘zim,
Dard bu aytilmas so‘zim,
Yosh to‘la ikki ko‘zim,
Onamga aytib qo‘ymang...

Mangu bo‘lmas biron g‘**,
Dunyo asli biri kam,
Yo qog‘oz, yo sen qalam,
Onamga aytib qo‘ymang...

Onamga aytib qo‘ymang...

 Muallif: Zohid Ziyo...