Loyihada MCHJlarga quyidagi yangi huquqlar berilmoqda:
– MCHJ ixtiyoriga ko‘ra, jamiyat ishtirokchilari ustav fondining (ustav kapitalining) hisobi shartnoma asosida Qimmatli qog‘ozlar markaziy depozitariysi tomonidan yuritilishi mumkinligi;
– o‘z hissasini to‘la qo‘shmagan ishtirokchilar, agar ushbu harakatlar jamiyatning faoliyat ko‘rsatishiga imkon bermayotgan yoki uni jiddiy tarzda qiyinlashtirishiga olib kelsa, jamiyatning ijro etuvchi organining arizasi asosida sud tartibida ishtirokchilar safidan chiqarilishi mumkinligi begilanmoqda.
MCHJ ishtirokchilarining ulushlari bilan bog‘liq nizolar sud tomonidan ko‘rib chiqilayotganda jamiyat ustav fondiga o‘zgartirishlar kiritish sud tartibida cheklanishi mumkin bo‘lmoqda.
Shuningdek, MCHJ o‘zining ta’sis hujjatlarida ko‘rsatilmagan faoliyat turi bilan ham shug‘ullanishi mumkinligi to‘g‘risidagi norma kiritilishi nazarda tutilmoqda.
Bundan tashqari, MCHJ ishtirokchilarining umumiy yig‘ilishi bayonnomasi rasmiylashtirilgandan so‘ng 5 ish kuni ichida yig‘ilish kotibi tomonidan jamiyat ishtirokchilarining umumiy yig‘ilishi bayonnomasi nusxasini barcha ishtirokchilarga pochta yoki elektron pochta orqali yuborishi shartligi nazarda tutilmoqda.
Loyihaga ko‘ra, ishtirokchilar tomonidan huquqlarning amalga oshirilishi boshqa ishtirokchilarning huquqlari va qonun bilan qo‘riqlanadigan manfaatlarini buzmasligi lozimligi qonun bilan mustahkamlanmoqda.