Talaba o‘rindosh emas, uni asosiy xodim sifatida ishga olish kerak.
@Yurist_Xizmati 4630-savol:
Assalomu alaykum. Men 2022-2023 o‘quv yilida, 3-kurs o‘qigan paytimda maktabga ishga kirganman. 2023-2024 o‘quv yilda ham ishladim. Direktorimiz meni o‘tgan o‘quv yili avgust oyida ishlashga qo‘ymadi, senga mumkin emas, sen talabasan deb, bu yil ham ishga chiqishimga ruxsat bermayapti, sentyabrdan ishga chiqasan deb,direktorni shu qilayotgan ishi qonuniymi, o‘qishni tugatdim, diplomimni olganman. Senga ta'til puli ham noto‘g‘ri to‘langan dedi, seni asosiy ish joying Universitet deydi, aslida talaba asosiy ishchi sifatida olinadiku, qolaversa o‘rindoshga ham ta'til puli to‘lanadi to‘g‘rimi?
YURIST JAVOBI:
Aslida talabalarni o‘rindoshlik asosida ishga qabul qilish mutlaqo noto‘g‘ri. Bunga quyidagilar asos bo‘ladi.
1️⃣ Mehnat kodeksi 121-moddasiga binoan ish beruvchi korxonada besh kundan ortiq ishlagan barcha xodimlarga mehnat daftarchasini tutishi shart, o‘rindoshlik asosida ishlovchilar bundan mustasno.
2️⃣ Shuningdek, Mehnat daftarchalarini yuritish tartibi to‘g‘risidagi yo‘riqnoma (ro‘yxat № 402, 29.01.1998 y.)ga muvofiq mehnat daftarchasi xodim ish haqi oladigan tashkilotning xodimlar bo‘limida yoki shunga mas’ul etilgan shaxsda saqlanadi. O‘rindoshlik asosida ishlayotganlarniki esa asosiy ish joylarida saqlanadi.
❇️ Talaba esa OTMda xodim emas, u bilan OTM o‘rtasida mehnat shartnomasi emas, ta’lim berish shartnomasi tuziladi va shartnomada u talaba sifatida e’tirof etiladi.
3️⃣ “Oliy ta’lim to‘g‘risida”gi Nizom (ro‘yxat raqami №1222, 22.02.2003) 50-bandiga muvofiq kunduzgi ta’lim shaklida tahsil olayotgan talabalar o‘qishdan bo‘sh vaqtlarida oliy o‘quv yurti va boshqa tashkilotlarda mehnat shartnomasi tuzgan holda ishlashlari mumkinligi belgilangan.
4️⃣ Vazirlar Mahkamasining 275-sonli qarori bilan tasdiqlangan “Xalq ta’limi xodimlari mehnatiga haq to‘lash to‘g‘risida”gi nizomning 8-bandiga ko‘ra Oliy ta’lim muassasasining kunduzgi, kechki, sirtqi ta’lim shakllarining pedagogika yo‘nalishlarida o‘qiyotgan shaxslar 3-kursdan boshlab o‘qishiga xalaqit bermagan holda pedagoglik ishini amalga oshirish uchun umumta’lim muassasalarida asosiy ish joyi sifatida ishga qabul qilinishi mumkin va ularga o‘rta maxsus, kasbiy ma’lumotga ega bo‘lgan tegishli lavozimdagi xodimning bazaviy tarif stavkasi singari bazaviy tarif stavkasi belgilanadi.
5️⃣ “Umumta’lim muassasalarida sinflarni komplektlash hamda tarifikatsiya ro‘yxatlarini shakllantirish tartibi to‘g‘risida”gi nizomning (ro‘yxat raqami № 3271) 15-bandida oliy ta’lim muassasalarining pedagogik yo‘nalish bo‘yicha bitiruvchi bosqich talabalariga tarifikatsiya asosida dars soatlarini berish mumkinligi qayd etilgan.
✅ Shunday ekan talaba boshqa ish joyiga ega bo‘lmasa, uni asosiy xodim sifatida ishga olish kerak.
Ta’til puli masalasiga kelsak, avvalgi yilda o‘rindoshlik asosida ishlaganingiz uchun ta’til puli berilmaydi
❗️Bu holatda siz tuman adliya bo‘limiga murojaat qilib direktorning harakatlari ustidan shikoyat qilishingiz lozim.