Ukam qachondan boshlab kv uchun beriladigan pulni olishga haqli?
@Yurist_Xizmati 4563-savol:
Assalomu alaykum meni òģlim Qirģistondan Òzbekistonga prevod qilish yòli b.n 3 kursdan òqishga qabul qilindi ,Sentabr oyidan òqishni boshladi lekin talabalikka qabul qilish buyruģi 2024 y fevral oyida chiqdi qachondan boshlab kv u.n beriladigan pulni olishga haqli bòladi.
YURIST JAVOBI:
Hurmatli fuqaro savolda kv un beriladigan pul deganda nimani nazarda tutganingizni tushunmadik. Shu sababli savolingizga aniq javob bera olmaymiz. Agar siz kvartira ijarasi uchun beriladigan pulni nazarda tutgan bo‘lsangiz, unda javobimiz quyidagicha.
Vazirlar Mahkamasining 2021-yil 24-sentabrdagi 605-son qaroriga ilovada tasdiqlangan Davlat oliy ta’lim muassasalarining ijara huquqi asosida yashayotgan talabalariga oylik ijara to‘lovining bir qismini O‘zbekiston Respublikasi Davlat budjeti hisobidan qoplab berish tartibi to‘g‘risidagi Nizom 3-bandiga ko‘ra ijara huquqi asosida yashaydigan talabalarning oylik ijara to‘lovi bir qismini qoplab berish qonunchilik hujjatlari talablariga muvofiq davlat soliq xizmati organlari tomonidan hisobga qo‘yilgan ko‘chmas mulk ijara shartnomasiga muvofiq ijara huquqi asosida yashaydigan ariza beruvchilarga nisbatan tatbiq etiladi.
☝️Shunga ko‘ra ijara pulini olish uchun talaba soliq organiga ro‘yxatga qo‘yilgan ijara shartnomasi asosida o‘zining doimiy yashash joyidan boshqa joyda yashashyotgan bo‘lishi lozim.
Ushbu nizomning 4-bandiga ko‘ra bitta turar joyda ikki va undan ortiq talaba ijara huquqi asosida yashagan holatlarda, ularning barchasi ijara shartnomasida qayd etilgan bo‘lishlari shart. Bunda talabgorlarga oylik ijara to‘lovining bir qismi ijara shartnomasining summasidan qat’i nazar:
Toshkent shahrida — bazaviy hisoblash miqdorining bir baravari,
qolgan hududlarda — bazaviy hisoblash miqdorining yarim baravari miqdorida to‘lanadi.
❗️Mazkur imtiyoz faqat davlat OTMlarining talabalariga talluqli hisoblanib, ukangiz davlat OTMsida o‘qisa, ushbu imtiyozdan foydalanishi mumkin.
Bunda ariza beruvchi mustaqil ravishda ushbu Nizomning 2-ilovasiga muvofiq shakldagi anketa-arizani ikki nusxada to‘ldirib, ijara shartnomasi nusxasi bilan o‘zi ta’lim olayotgan fakultetning yoshlar bilan ishlash bo‘yicha dekan o‘rinbosari yoki oliy ta’lim muassasasining talabalarni turar joy bilan ta’minlash ishlarini muvofiqlashtiruvchi bo‘limiga topshiradi.
Ushbu nizomning 8-bandiga ko‘ra oylik ijara to‘lovining bir qismini qoplab berish:
➖o‘quv yili davomida, ya’ni har yili 1-sentyabrdan 1-iyulgacha etib yoki o‘qitish dasturi bo‘yicha o‘quv yilining davomiyligiga qarab belgilanadi;
➖ariza beruvchi tomonidan har oyning 7-sanasiga qadar arizalar mas’ullarga taqdim etilganidan so‘ng amalga oshiriladi.
✅ Xulosa qiladigan bo‘lsak, sizdagi vaziyatda ukangiz yuqorida aytilgan muddatlarda ariza bilan murojaat qilgandan so‘ng, unga kv uchun pul berilishi mumkin. Hurmatli fuqaro agar siz kv deganda boshqa narsani nazarda tutgan bo‘lsangiz, unda qaytadan savol berishingizga to‘g‘ri keladi. Bu esa sizga kelasi safar qayergadir murojaat qilganda, e’tiborli bo‘lib, murojaatda har bir so‘zni to‘liq yozishga sabab bo‘ladi deb hisoblaymiz.