AYOLINGNI AVAYLA
Xo‘rlik yoshi bo‘ladi taxir,
Urush, janjal kimga ham kerak,
O‘zni suyumoq hudbinlik axir,
Ayolingni avayla erkak.
Ko‘zlariga ko‘z yosh to‘lmasin,
Dilda mehr bog‘i so‘lmasin,
O‘ttizida o‘tin bo‘lmasin,
Ayolingni avayla erkak.
Sharob sarhush, sher qilar kimni,
Kimni to‘ng‘iz,kimlarni jinni,
Ojiz urar bilgin xotinni,
Ayolingni avayla erkak.
Kimda haqqing,kimda qarzing bor,
O‘zing bilgan hayot tarzing bor,
Frishtangdan nima arzing bor,
Ayolingni avayla erkak.
U yaxshi do‘st,u aziz sirdosh,
Sirlaringni qilmaydi hech fosh,
Sening uchun bir umr yo‘ldosh,
Ayolingni avayla erkak.
Alvon gullar shonasidir u,
Duru,marjon donasidir u,
Bolalaring onasidir u,
Ayolingni avayla erkak.
Elda yorug‘ yuzing uchun sen,
Erman degan so‘zing uchun sen,
Bilsang faqat o‘zing uchun sen,
Ayolingni avayla erkak.
✿•┈┈┈┈••ৡ❀ৡ•┈┈┈┈•✿