“Bildirgi” yoki “ma’lumotnoma” deb yozsa, yozma tushuntirish o‘rniga o‘tmaydimi?
Ayrim xodimlar javobgarlikdan qochish uchun yoki ertaga nizoda yutib chiqish uchun tushuntirish xati so‘ralganida, yozadi, lekin “tushuntirish xati” o‘rniga “bildirgi”, “ma’lumotnoma” yoki “ariza” deb yozadi. Hujjatning ichida va mazmunida xodimning tushuntirishi bo‘ladi, lekin nomi boshqacha.
Ertaga nizo chiqsa, “yo‘q, men tushuntirish xati yozmaganman, bildirgi yozganman” deb turadi. Haqiqatdan ham amaliyotda uchrab turadi, bunday holatlar, to‘g‘rimi?
Mehnat kodeksining 313-moddasida ish beruvchi xodimdan intizomiy jazo chorasi qo‘llanilguniga qadar yozma tushuntirishni talab qilishi, shu jumladan, agar intizomiy qilmish xizmat tekshiruvi natijalariga ko‘ra aniqlangan bo‘lsa, talab qilishi shart.
Ya’ni, intizomiy qilmish haqida xodimdan yozma ravishda tushuntirish berish, yanada aniqroq aytadigan bo‘lsak, bu qilmish yuzasidan o‘z munosabatini yozma ravishda tushuntirib berish talab qilinadi. Yozma izoh so‘raladi.
Bunday yozma munosabat tushuntirish xati deb nomlanishi ifodaning aniq bo‘lishini ta’minlaydi, bu to‘g‘ri. O‘z navbatida, qilmish yuzasidan xodimning yozma munosabati va tushuntirishi “bildirishnoma”, “ma’lumotnoma” yoki “ariza” deb nomlangan hujjat shaklida berilishi tushuntirish olinmagan deb hisoblashga asos bo‘lmaydi.
Chunki bu yerda gap hujjatning nomida emas, balki uning mazmunidadir.
Deylik, xodim biror-bir intizomiy qilmish yuzasidan tushuntirish so‘ralganida, u o‘zining munosabatini, ya’ni aybi bilan bo‘lgan-bo‘lmaganini tushuntirib yozyapti, lekin bu hujjatni “bildirgi” deb nomlagan. Farqi yo‘q, yozma tushuntirishga o‘tadi.