MЕN AVTOMOBIL HAYDASH HUQUQIDAN MAHRUM QILINGANMAN SHUNI HAL QILSA BO‘LADIMI?
Assalomualaykum Meni haydovchilik guvohnomani 18 oyga avtomobil boshqarish xuquqidan cheklangan 136-moddaga asosan, Endi cheklov muddatidan oldinroq guvohnomani qanday xuquqiy yo‘l bilan olsam bo‘ladi? Javob uchun oldindan raxmat.
JAVOB:
Ma’muriy javobgarlik to‘g‘risidagi Kodeksning 343-moddasiga ko‘ra, Muayyan muddatga transport vositasini boshqarish huquqidan yoki ov qilish huquqidan mahrum etilgan shaxs mehnatga halol munosabatda bo‘lishi va namunali xulq-atvori bilan o‘zini ko‘rsatgan taqdirda, unga nisbatan jazo qo‘llagan jinoyat ishlari bo‘yicha sud bunday huquqdan mahrum qilish muddatini belgilangan muddatning kamida yarmi o‘tgach va sud tomonidan tayinlangan jarima to‘langach, korxona, muassasa, tashkilot ma’muriyatining iltimosi bilan qisqartirishi mumkin.
Ya’ni, agar siz belgilangan 18 oy jazoni eng kamida yarimini o‘tagan bo‘lsangiz, va ushbu muddat ichida namunali xulq ko‘rsatib (masalan, hech qanday jarimaga tortilmagan, huquqbuzarlik sodir qilmagan), sud tomonidan qo‘llangan jarimani to‘lagan bo‘lsangiz jazoyingiz muddatidan oldin tugashi mumkin.
Ammo, sudga iltimos bilan murojaat qiluvchi shaxs siz emas, balki, korxona, muassasa, tashkilot ma’muriyati bo‘lishi kerakligi moddada belgilangan. Shu sababli, agar yuqoridagi shartlar bajarilgan bo‘lsa, MFY yoki ishxonangiz ma’muriyati sudga iltimosnoma bilan murojaat qilishi mumkin.