❓Davlat mulki nima va ijaraga beruvchi tomonidan davlat mulki qanday tartiblarda ijaraga beriladi?
— Davlat mulki — respublika mulki va ma’muriy-hududiy tuzilmalarning mulki (munitsipal mulk)dan iborat bo‘lgan ommaviy mulk shuningdek, davlat tashkilotlari, korxonalari va muassasalari hamda xo‘jalik jamiyatlariga tasarruf etish huquqisiz berilgan davlat mulki.
Ijaraga beruvchi tomonidan davlat mulki quyidagi tartiblarda ijaraga beriladi:
▫️savdo platformasida o‘tkazilgan elektron onlayn-auksion savdolar orqali;
▫️O‘zbekiston Respublikasi Prezidentining hujjatlari va Vazirlar Mahkamasining qarorlarida davlat mulki jismoniy va yuridik shaxsga ijaraga berilishi belgilanganda (ijaraga beruvchi, balansda saqlovchi va ijaraga oluvchi o‘rtasida tuzilgan shartnoma asosida);
▫️qonunchilikda belgilangan boshqa tartiblar asosida.
____
❓Davlat mulkini ijaraga oluvchi tomonidan ijtimoiy soha obyekti tarkibidagi yer uchastkasida nimalarni amalga oshirish taqiqlanadi?
— Davlat mulkini ijaraga oluvchi tomonidan ijtimoiy soha obyekti tarkibidagi yer uchastkasida quyidagilarni amalga oshirish taqiqlanadi:
▫️binolar va inshootlar, jumladan, yer osti inshootlarini qurish (yengil konstruksiyali inshootlar bundan mustasno);
▫️ko‘ngilochar obyektlar faoliyatini tashkil etish (madaniyat obyektlarining yer uchastkalari bundan mustasno);
▫️qonunchilik hujjatlarida taqiqlangan faoliyatni yuritish.
Asos: Vazirlar Mahkamasining 2023-yil 14-dekabrdagi 660-son qarori.