Sinf rahbari sinf xonasini o‘z hisobidan ta’mirlashga majburmi?
@Yurist_Xizmati 5150-savol:
Assalomu alaykum sinf rahbari sinf xonasini keyingi o‘quv yili uchun o‘z hisobidan ta'mirlashga majburmi?
YURIST JAVOBI:
1️⃣Vazirlar Mahkamasining 2017 yil 15 martdagi 140-son qarori bilan tasdiqlangan “Umumta’lim maktabi to‘g‘risida”gi nizomning IV bo‘limi maktablarning moliya-xo‘jalik faoliyatiga bag‘ishlangan. Mazkur bo‘limda maktabning moliyaviy mablag‘i davlat budjeti va maktabning boshqa manbalardan tashkil topuvchi o‘z mablag‘lari hisobiga shakllantirilishi belgilangan. Maktabning moliyaviy mablag‘lari uning to‘la ixtiyorida bo‘lib, uni taqsimlash huquqi Maktab kengashiga tegishlidir.
Maktabning o‘z mablag‘lari quyidagi asosiy manbalar hisobiga shakllanishi mumkin:
maktabning xo‘jalik faoliyatidan, maktab tomonidan ko‘rsatilgan pulli xizmatlardan, maktab binosi va jihozlarini ijaraga berishdan olingan daromadlar;
davlat, tashkilotlar, ota-onalar va boshqa fuqarolarning ixtiyoriy badallari;
maktab ustaxonalari, maktab uchastkasi va issiqxonalari mahsulotlarini sotishdan tushgan daromadlar.
Mazkur qoidaning mazmunidan ko‘rinib turibdiki, maktab faqat ixtiyoriylik asosida ota-onalar va boshqa fuqarolar(o‘qituvchilar ham shular qatoriga kiradi)dan pul mablag‘lari qabul qilishga haqli.
2️⃣Shu bilan birga, O‘zbekiston Respublikasi xalq ta’limi vazirining 2018 yil 26 dekabrdagi 16-mh-son buyrug‘i bilan tasdiqlangan “Umumiy o‘rta ta’lim muassasasining kuzatuv kengashi haqida”gi na’munaviy nizomning 31-bandiga muvofiq ta’lim muassasasida o‘quvchilar va ularning ota-onalaridan turli xil sabablar bilan Kengash a’zolari, ta’lim muassasasi rahbari va boshqa xodimlari tomonidan pul mablag‘larini yig‘ish qat’iyan taqiqlanadi.
3️⃣Maktabgacha va maktab ta’limi vazirining 2024-yil 16 - oktyabrdagi 334-sonli buyrug‘iga 43-ilovada tasdiqlangan Umumiy o‘rta ta’lim maktabi (maktab-internat) xodimlarining lavozim yo‘riqnomalariga asosan umumta’lim maktablaridagi o‘qituvchilarning asosiy vazifalari belgilab berilgan.
♂️ Ushbu vazifalar ichida sinf xonasini yoki maktabning ma’lum bir qismini ta’mirlash haqida biror bir qoida belgilanmagan.
❌ Shunday ekan o‘qituvchidan remont uchun pul yig‘ishni yoki remont qilishini talab etish noqonuniydir.
♂️ Chunki yangi tahrirdagi Mehnat kodeksi 115-moddasiga muvofiq ish beruvchi xodimdan uning mehnat shartnomasida shart qilib ko‘rsatilmagan ishni bajarishni talab qilishi taqiqlanadi.
❌ Yuqoridagilardan xulosa qiladigan bo‘lsak, o‘qituvchilarni remontga har qanday usulda jalb qilish noqonuniydir. Ya’ni sizlardan jalyuzi parda uchun pul yig‘ish yoki uni sizlarning hisobingizdan o‘rnatish ham noqonuniy sanaladi.
❗️Sizlar bu masalada tuman prokuraturasiga murojaat qilishingiz lozim deb hisoblaymiz.
✉️ Yuristga savol yuborish
Yurist bilan qo‘ng‘iroq orqali bog‘lanish
Barcha turdagi hujjatlarga buyurtma berish
Rasmiy kanalimiz:
@Yurist_Xizmati