SINFDA DAVOMAT KAM BO‘LSA, SINF RAHBARLIK TO‘LOVIDAN USHLAB QOLINISHI…
❗️Pedagogga sinf rahbarligi uchun to‘lanadigan qo‘shimcha to‘lovni ushlab qolish noqonuniy.
Birinchidan, Maktabgacha va maktab ta’limi vazirining 27.06.2023 yildagi 190-sonli buyrug‘i bilan tasdiqlangan Umumiy o‘rta ta’lim muassasasi sinf rahbarining yo‘riqnomasiga muvofiq sinf rahbari sinfdagi davomatni nazorat qilishi, bu haqida ota-onalar bilan bog‘lanib, kelmaganlik sabablarini aniqlashi va maktab rahbariyatiga axborot kiritishi kerak.
Ushbu buyruqning 1-ilovasi hamda Xalq ta’limi vazirligining 01.07.2021 yil 206-sonli buyrug‘iga asosan MMIBDO‘ning lavozim majburiyatlaridan biri bu sinf rahbarlarining faoliyatini tashkil etish, o‘quvchilarining davomatlarini nazorat qilish hisoblanadi.
Yuqoridagi qoidaning mazmuniga ko‘ra, sinfdagi davomadni ta’minlashga sinf rahbari javobgar emas. U davomadni o‘z vaqtida amalga oshirib, darsga kelmagan o‘quvchilar haqida yuqoridagi majburiyatini bajarishi yetarli.
Ikkinchidan, Mehnat kodeksining 269-moddasiga ko‘ra umumiy qoidaga ko‘ra xodimning yozma roziligi bilan, xodimning roziligi bo‘lmagan taqdirda esa ushbu moddaning ikkinchi qismiga muvofiq, ish haqidan ushlab qolinishi mumkin.
Xodimning roziligisiz, uning ish haqidan ushlab qolish asoslari ichida sizdagi holat mavjud emas.
Ushbu asoslarga ko‘ra, sinf rahbarlik uchun to‘lanadigan qo‘shimcha to‘lovni ushlab qolish asossiz. Bu holatda ish beruvchiga nisbatan Ma’muriy javobgarlik to‘g‘risidagi kodeksning 49-moddasiga binoan mansabdor shaxsga mehnat va mehnatni muhofaza qilish to‘g‘risidagi qonunchilikni buzganligi uchun jarima solishga sabab bo‘ladi.
telegram kanali - yurist maslahati