Tomog‘ingizga nimadir tiqilyaptimi? Bu — halqum yoki qizilo‘ngach o‘smasi bo‘lishi mumkin
Ayrim odamlarda taomlanayotgan payt luqma tomoqda tiqilib qolganday bo‘ladi. Mutaxassislarning fikricha, ushbu holat bir necha xavfli kasalliklar alomati bo‘lishi mumkin.
⚕️— Tomoqdagi noqulaylik, ovqatni chaynash va yutish paytidagi qiyinchiliklar barcha yoshdagi insonlarda kuzatiladi, — deydi Olmazor tuman tibbiyot birlashmasi boshlig‘i Azizbek Nizamov. — Bu esa bir necha kasalliklar sabab paydo bo‘lishi mumkin.
— Xususan, tonzillit, disfagiya, surunkali nevroz va buqoq kabi xastaliklarda ko‘pincha tomoqda tiqilish hissi yuzaga keladi. Hatto, bu – halqum yoki qizilo‘ngach o‘smalarining belgisi bo‘lishi ham mumkin. Kasallikning asl sababini aniqlash uchun bir nechta shifokor ko‘rigidan o‘tish tavsiya etiladi.
Buni esa gastroyenterolog qabulidan boshlash maqsadga muvofiq. Ushbu mutaxassis tomonidan tayinlangan tibbiy tekshiruvlardan so‘ng ovqat hazm qilish organlari qanday holatda ekanligi va ular o‘z vazifalarini qanchalik yaxshi bajarayotgani aniq bo‘ladi. Agar bemorda qizilo‘ngach yoki oshqozon kasalligi bo‘lmasa, keyingi bosqichda endokrinolog ko‘rigidan o‘tiladi.
U esa qalqonsimon bezning umumiy holatini bilish uchun bir nechta tibbiy tekshiruvlar tayinlaydi. Odatda ushbu bosqichda nima uchun ovqat iste’mol qilgandan keyin tomoq sohasida noqulaylik sezilayotganining sabablari ayon bo‘ladi. Agar qalqonsimon bezning ultratovush tekshiruvi organning patologiyalarini aniqlamasa, otorinolaringologdan tibbiy maslahat olish kerak. Ehtimol bu holat tonzillit tufaylidir.
Tashxisning yakuniy bosqichi nevrolog qabuliga borish bilan yakunlanadi. Boisi, tomoqdagi tiqilish hissi stress yoki surunkali nevrozlar tufayli ham yuzaga kelishi mumkin.
‼️ Kasallikning haqiqiy sababi aniqlangach, muammoni bartaraf etish yanada oson bo‘ladi. Shunday ekan salomatlikka e’tiborli bo‘lib, o‘z vaqtida shifokorga murojaat qiling.