Bir oylik xarbiy xizmatga majburiy qo‘l qo‘ydirishlari to‘g‘rimi?
@Yurist_Xizmati 4629-savol:
Assalom aleykum. Men chet elda öqiyman. Kecha onamni mudofadan chaqirib armiyaga borishim kerakligini aytibdi. Öqiyapman desam ham “Meni qiziqtirmaydi” dedi. Sudga berish bilan tahdit qilib gapirdi. Qonuniy tarafini bilmoqchi edim. Chunki ösha xodimni men ham sudga bermoqchiman.
YURIST JAVOBI:
O‘zbekiston Respublikasining 12.12.2002 – yildagi “Umumiy harbiy majburiyat va harbiy xizmat to‘g‘risida”gi qonuning 6 – moddasiga ko‘ra harbiy xizmatga yaroqli, biroq Qurolli Kuchlar safiga navbatdagi muddatga chaqirilmagan shaxslar safarbarlik chaqiruvi rezervi safiga olinadilar.
Shu sababdan o‘g‘lingiz ham 18 – 27 yosh orasida harbiy xizmatga yaroqli O‘zbekiston fuqarosi bo‘lgani uchun safarbarlik chaqiruvi rezervidagi harbiy xizmatga chaqiriladi.
❗️Shunga ko‘ra siz ham harbiy xizmatni o‘tashga majbursiz.
Qonunning 21-moddasiga muvofiq chaqiriluvchilarning muddatli harbiy xizmatga, safarbarlik chaqiruvi rezervidagi xizmatga chaqirilish muddatini kechiktirish tuman (shahar) chaqiruv komissiyasining qarori asosida ularning oilaviy sharoitiga ko‘ra, salomatligiga ko‘ra, o‘qishni davom ettirishi uchun amalga oshiriladi.
☝️E’tibor bergan bo‘lsangiz, ushbu qoidada o‘qishni davom ettirishi uchun muddatni kechiktirish mumkinligi qayd etilgan.
Shuningdek, ushbu moddaning uchinchi qismida oliy ta’lim muassasalarida kunduzgi o‘qishda tahsil olayotgan talabalar o‘qishni davom ettirishlari uchun ularning chaqirilish muddati o‘qishni tamomlagunlariga qadar kechiktirilishi belgilangan.
Mazkur moddaning to‘rtinchi qismiga muvofiq oliy ta’lim muassasalaridagi ta’limning kunduzgi va kechki shaklida tahsil olayotgan talabalar o‘z roziligi bilan safarbarlik chaqiruvi rezervi xizmatiga olinishi mumkin. Bunda talabalar bir oylik harbiy yig‘inlarni o‘tashga iyul-avgustda jalb etiladi.
E’tibor bergan bo‘lsangiz, normada talabaning roziligi bilan safarbarlik chaqiruvi rezervi xizmatiga olish mumkinligi qayd etilgan.
❕Agar rozilik bo‘lmaydigan bo‘lsa, ushbu normaning birinchi qismiga ko‘ra o‘qish muddati tugagan kungacha muddat kechiktirilishi kerak bo‘ladi.
❗️Bu vaziyatda siz mudofaa bo‘limining harakatlari ustidan tuman prokuraturasiga shikoyat qilishingiz lozim.