Ukituvchi ta’til vaktida malaka oshirishga borsa, unga pul tulanadimi?
@Yurist_Xizmati 4545-savol:
Ukituvchi ta’til vaktida oflayn tarzida malaka oshirsa unga pul tulanadimi? Ta’til vakti chuziladimi? Menga ta’til vaktida ma’muriyat ukishga yubora olmaydi, buyruk chikara olmaydi diyildi.
YURIST JAVOBI:
Mehnat kodeksining 229-moddasiga ko‘ra agar har yilgi mehnat ta’tilidan foydalanishga monelik qiluvchi sabablar ta’til boshlanguniga qadar kelib chiqqan bo‘lsa, xodim bilan ish beruvchi o‘rtasidagi kelishuvga binoan ta’tildan foydalanishning yangi muddati belgilanadi. Bunday sabablar ta’til davrida kelib chiqqan hollarda ta’til tegishli kunlar soniga uzaytiriladi yoki xodim bilan ish beruvchining kelishuviga ko‘ra ta’tilning foydalanilmay qolgan qismi boshqa muddatga ko‘chiriladi.
☝️Mana shu qoidaga ko‘ra siz ta’til davrida malaka oshirishga jalb qilinganingiz uchun ta’til muddati malaka oshirish muddati tugaydigan muddatga uzaytiriladi. Bunda sizning malaka oshirish davomida ish haqi qoplanadi.
Mehnat kodeksining 367-moddasiga muvofiq xodimlarni qayta tayyorlash va ularning malakasini oshirish xodim hamda ish beruvchi uchun ixtiyoriy tartibda yoki, agar xodimlarni majburiy qayta tayyorlash va ularning malakasini oshirish talablari mehnat to‘g‘risidagi qonunchilikda hamda mehnat haqidagi boshqa huquqiy hujjatlarda, mehnat shartnomasida nazarda tutilgan bo‘lsa, majburiy tartibda amalga oshirilishi mumkin.
Vazirlar Mahkamasining 2022-yil 17-yanvardagi 25-son qaroriga 1-ilovada tasdiqlangan Xalq ta’limi xodimlarini uzluksiz kasbiy rivojlantirish tizimini tashkil etish tartibi to‘g‘risidagi Nizom 130-bandiga asosan ixtisoslashtirilgan ta’lim tashkilotlariga ishdan ajralgan holda malaka oshirishga yuborilgan tinglovchilarning o‘qishi davrida asosiy ish joyi bo‘yicha lavozimi va o‘rtacha ish haqi saqlanib qoladi,
Shuningdek ushbu kodeks 370-moddasiga asosan xodim ish beruvchi va xodim uchun majburiy bo‘lgan qayta tayyorlashga yoki malaka oshirishga yuborilgan taqdirda, ish beruvchi qayta tayyorlash yoki malaka oshirish davrida xodimning ish joyini (lavozimini) va o‘rtacha ish haqini saqlab qolishi shart.
✅ Shunga ko‘ra siz ishdan ajralgan holda malaka oshirishga jalb etilgan bo‘lsangiz, unda sizning ish haqingiz saqlanib qolishi va sizga to‘lanishi kerak.