Otangni mashinasi bor deb bola puli berishni rad qilishlari to‘g‘rimi?
@Yurist_Xizmati 4465-savol:
Assalomu aleykum mening 2 nafar voyaga yetmagan farzandim bor turmush o‘rtog‘im 4 yil avval avto halokat tufayli vafot etgan. Men 404000 so‘m bolalar nafaqasi olar edim. Uning vaqti kelib tugadi shu sababli boshqatan ariza topshirish uchun mahallaga chiqsam ular senga chiqmaydi chunki dadangni mashinasi bor dedi. Men o‘zim maktabda ishlayman oyligim 1200000 so‘m. Xozir qizlik uyimda yashayman meni nomimda na uy na yer bor. Lekin mahalladagilar sen dadangni mashinasini xaydading deb ro‘kach qilishyapti shu to‘g‘rimi oldindan raxmat.
YURIST JAVOBI:
Vazirlar Mahkamasining 2021-yil 21-oktabrdagi 654-son qaroriga 1-ilova bilan tasdiqlangan “Kam ta’minlangan oilalarni “Ijtimoiy himoya yagona reyestri” axborot tizimi orqali aniqlash, ularga kam ta’minlangan oilalar bolalari uchun nafaqa va moddiy yordam tayinlash va to‘lash tartibi to‘g‘risida”gi nizomga ko‘ra oila:
2022-yildan boshlab — oilaning har bir a’zosiga jami bir oylik o‘rtacha daromad minimal iste’mol xarajatlari miqdoridan oshmaganda kam ta’minlangan deb e’tirof etiladi.
Yuqoridagi qoidaning mazmuniga ko‘ra oilangizning daromadi hozir har bir oila a’zosiga hisoblaganda 621 ming so‘mdan kam bo‘lsa, unda siz kam ta’minlangan deb topilishingiz mumkin.
Bunda ushbu nizom 22-bandiga ko‘ra oilaning bir a’zosiga to‘g‘ri keladigan bir oylik o‘rtacha daromad bolalar nafaqasi yoki moddiy yordam olish uchun murojaat qilingan oydan oldingi oygacha bo‘lgan oxirgi uch oyi uchun hisoblab chiqilgan barcha oila a’zolarining daromadi summasini oila tarkibiga kiritiladigan oila a’zolari soniga va uchga bo‘lish orqali aniqlanadi.
Qarang! Mazkur nizomning 20-bandiga ko‘ra ariza beruvchi oilasining har bir a’zosiga to‘g‘ri keladigan bir oylik o‘rtacha jami daromad ushbu Nizomning 7-bandida belgilangan mezondan oshganda bolalar nafaqasi yoki moddiy yordam tayinlash rad etiladi.
Shuningdek, mazkur bandga ko‘ra ariza beruvchi yoki uning oila a’zolari foydalanuvida bo‘lgan yoxud ishonchnomaga asosan ishlab chiqarilgan muddati 12 (oila a’zosi I yoki II guruh va 18 yoshgacha bolalikdan nogiron bo‘lsa 7) yildan oshmagan, texnik holati soz bo‘lgan yengil avtotransport vositasi bo‘lganda ham ariza rad qilinadi.
Endi qarang! ushbu normada oila a’zolari jumlasi qo‘llanilgan. Mazkur nizom 22-bandiga ko‘ra bolalar nafaqasi yoki moddiy yordam olish uchun oila tarkibiga:
fuqarolik holati dalolatnomalarini yozish organlarida nikohi qayd etilgan er-xotin (yoki ularning biri) va ular bilan birga yashaydigan va ularning qaramog‘ida bo‘lgan bolalar (shu jumladan, vasiylikka (homiylikka) olingan bolalar);
shuningdek, ota-onalari bilan birga yashaydigan va o‘z oilasiga ega bo‘lmagan 18 yoshdan katta bolalar (shu jumladan, vasiylikka (homiylikka) olingan bolalar), yolg‘iz onalar (otalar) kiritiladi.
❗️Shunga ko‘ra sizdagi vaziyatda ota-onangiz, sizning oila a’zoyingiz tarkibiga kirmaydi deb hisoblaymiz. Bu vaziyatda tuman adliya bo‘limiga murojaat qilishingiz lozim.