NOGIRONLIK BЕRILGAN VA KASALLIK VARAQASIDA BO‘LGAN XODIMNING ISH O‘RNI SAQLANADIMI?
SAVOL.
Ayolimga 22 fevral kuni sog‘lig‘ida muammosi bo‘lganligi uchun 2-guruh nogironligi berildi. 180 kun kasallik varaqasida bo‘ladi. Kasbi o‘qituvchi. Endi maktabda ish o‘rni saqlanib qoladimi?
JAVOB.
Xodimning kasallik varaqasida bo‘lishi yoki uning sog‘lig‘iga ko‘ra nogironlik guruhi berilishi mehnat shartnomasini bekor qilish uchun yetarli asos emas.
❗️Agar xodim TIEK (tibbiy-ijtimoiy ekspert komissiyasi)ning tibbiy xulosasida bajarayotgan ishiga loyiq deb topilgan bo‘lsa, u o‘z ishini bemalol davom ettirishi mumkin. Hozircha ayolingiz mehnatga layoqatsizlik davrida bo‘lsa, unga kasallik varaqasiga asosan mehnatga layoqati tiklanguniga qadar nafaqa ham to‘lab beriladi.
Agar TIEK tomonidan yengilroq, sog‘lig‘ining holati bo‘yicha qarshi ko‘rsatma bo‘lmagan ishga doimiy o‘tkazishga muhtojlik yuzasidan tibbiy xulosa berilgan bo‘lsa, bu holatda ayolingizning roziligi bilan ish beruvchi shunday yengilroq ishga o‘tkazishi shart. Ayolingiz yengilroq ishga o‘tishdan bosh tortsa yoki ish beruvchida uning sog‘lig‘i holati bo‘yicha qarshi ko‘rsatma bo‘lmagan boshqa ish bo‘lmasa yoxud tibbiy xulosaga ko‘ra ayolingizga o‘z ishni bajarishi umuman to‘g‘ri kelmasa, ta’lim muassasasi a’zolariga yoki u dars beradigan o‘quvchilar uchun xavf tug‘dirsagina, mehnat shartnomasi sog‘lig‘i holatiga ko‘ra bekor qilinishi mumkin.
❗️Tibbiy xulosaga diqqat qiling, agar ayolingizning mehnat shartnomasi bekor qilishga asos bo‘lmay ishda qolsa, unga Mehnat kodeksidagi nogironligi bo‘lgan shaxslar uchun beriladigan bir qator imtiyozlardan tashqari soliq imtiyozi ham qo‘llaniladi. Ya’ni Soliq kodeksining 380-moddasiga asosan, uning daromadlaridan qisman (daromadlar qaysi oyda olingan bo‘lsa, o‘sha oyda har bir oy uchun mehnatga haq to‘lashning eng kam miqdorining 3 baravari miqdoridagi daromadlar bo‘yicha) soliq solishdan ozod etiladi. Bu imtiyoz TIEK ma’lumotnomasi asosida beriladi.